【咁都得?】陳敏之內地餅店請人 專才移民香港作招徠

    43

    圖︰陳敏之將進軍內地開餅店,但被發現以「專才移民香港」做招徠,網民大鬧。(fb圖片)

    陳敏之近年嘗試創業﹐投資曲奇餅店,短短4年已經喺香港同澳門開咗合共8間分店!最近,有網民發現陳敏之正為籌備中嘅廣州店請緊人,廣告除咗印有陳敏之嘅「長腿相」,仲有另一亮點,就係「表現傑出卓越員工,有機會獲公司推薦,到香港專才移民」喇!

    網民派嬲鬧爆

    有網民睇到就留言話︰「陳敏之你開餅店開到返大陸我唔理你,但你用到推薦『香港專才移民』呢招嚟請人,係咪暗示香港好過內地,你咪唔愛國先?你間『Blesscuit』香港好多分店㗎喎,係咪想叫強國人唔好幫襯你?」留意返,招聘廣告係請緊正副店長、領班、售貨員同兼職,究竟係咪真係可以申請到「專才」呢?

    又有網民認為餅店工資太低,做店長嘅人工最多得8000蚊人民幣,質疑喺廣州真係生活到?又如果「專才」真係嚟到香港,但只攞到一樣嘅工資,就更加唔知點生活喇!

    陳敏之︰呢部份係大陸同事搞

    對於呢個廣州店招聘廣告,陳敏之表示︰「我係負責香港嘅marketing,呢部份係大陸嗰邊同事搞,我都唔係太清楚,都要問下,但相信寫得出都應該係嘅!」

    陳敏之又話,薪金都係大陸嗰邊同事定,但佢相信價錢都合理嘅!

    圖︰陳敏之幾日前先去完台北拍旅遊節目,應該都真係冇咩時間處理請人事宜吧!(fb圖片)
    圖︰陳敏之除咗開餅店,2016年冬至仲榮升媽咪!(fb圖片)

    這篇文章 【咁都得?】陳敏之內地餅店請人 專才移民香港作招徠 最早出現於 流動新聞

    分享給好友: